Web
Analytics
Gracian Galarraga omenduko dute gaur arratsaldeko Zakila Biran - Lasterketak.eus

Gracian Galarraga omenduko dute gaur arratsaldeko Zakila Biran

  • Lasterketak.eus
  • Gracian Galarraga omenduko dute gaur arratsaldeko Zakila Biran

gracian galarragaZumaiako XIII. Zakila Birak ehunka lagun elkartuko ditu herrian eta inguruetan, 20 kilometroko ibilbidea egiteko.

Gaur 17:00etan hasiko da Zumaiako XIII. Zakila Bira. Aurreko urteetakoa bezala, jendetsua izango da gaurkoa ere. Atzorako 600 korrikalarik baino gehiagok emana zuten izena, eta gaur gehiagok ematea espero dute antolatzaileak.

Korrikalarien artean, bereziki bat izango da protagonista gaurkoan: Gracian Galarraga. Atleta beteranoak atzo oraindik ez zuen baieztatu proban parte hartuko duen ala ez, baina aurten berak jasoko du Zumaiako Udalaren oroigarria eta, horretaz gain, berak emango dio hasiera lasterketari.

Ibilbidean aldaketa txikiak

Urtero bezala, korrikalariek Zumaia-Arroa-Iraeta-Aizarnazabal-Oikia-Bedua-Zumaia ibilbidea egingo dute.

Erribera kaletik irten eta bertan amaituko da korrika saioa, baina aurten aldaketa txikiak egin dituzte hasierari eta amaierari dagokionez. Izan ere, Oxford eraikina eraberritzen ari dira eta, inguru hori itxita egongo da. Hala, Erribera kaletik Eusebio Gurrutxaga plaza aldera abiatuko dira korrikalariak. Amaiera, berriz, Justa tabernaren parean izango da.

Izena emateko aukera oraindik

Gehienez 850 korrikalarik hartu ahal izango dute parte proban, eta gaur ere izena emateko aukera izango dute korrikalariek. Proba hasi baino hiru ordu laurden lehenagora arte izango dute horretarako aukera, itsas kiroldegian. Honen ordutegia 09:00etatik 13:00etara eta 14:30etik 16:30era da. 13 euro kostako da izena ematea, eta parte-hartzaile guztiek elastiko bana jasoko dute trukean.

Antolatzaileek adierazi dutenez, ibilbidean zehar hiru edari postu jarriko dituzte. Aurrena bosgarren kilometroan, Agote auzoan; bigarrena hamaikagarren kilometroan, Aizarnazabalgo bidegurutzean; eta, hirugarrena, hamazazpigarren kilometroan, Oikian.

Proba amaitu ondoren, itsas kiroldegian dutxatzeko aukera izango dute parte-hartzaileek.

14 urtetatik korrika

Probaren ondoren jasoko du omenaldia ere Galarragak. 55 urte ditu, eta 14 urtetatik egin du korrika iraupen ertaineko lehiaketetan, Atletico SS taldearekin. Bere ibilbidean hainbat lesio izan duen arren, zumaiarrak korrika egiten jarraitzen du egun ere, nahiz eta orain ez duen lehiatzen. Azaroan federatu bezala 40 urte egingo ditu.

Erlazionaturiko lasterketak
Publizitatea