09:00etatik 10:00etara Herriko Enparantzan izena emateko aukera izango da, baita aurretik ere.
San Marko Eguna dela eta makina bat ekitaldi izan ohi da Errenteria-Oreretan. Pontikako jaiak edo San Markoko erromeria kasu. Baina
azken urteetan egun honetako klasiko bilatu da San Markoko igoera; XIII. aldia du aurten lasterketak. Etzi izango da proba, Errenteriako Atletismo Taldeak (EAT) antolatuta, eta lehiaz gain, festa giroa izango da nagusi. Herenegun egindako aurkezpen ekitaldian, lasterketaren xehetasun guztiak eman zituzten EATko eta Udaleko ordezkariek.
Herriko Enparantzatik abiatuko da proba, 10:30ean, urtero legez. 5.500 metroko ibilbide malkartsua izango da aurretik. Parte hartu nahi duen orok irteera gunean izena emateko aukera izango du, udaletxeko arkupetan horretarako prestatuko den gunean, 09:00etatik 10:00etara.
Aurretik ere izango da izena emateko aukera honako tokietan: Susperregi eta Laister kirol dendetan; Pelukasen kioskoan; www.herrikross.com webgunean eta www.atleticorenteria.comwebgunean. Prezioa sei eurokoa izango da bihar arte, eta bederatzi eurokoa lasterketa egunean bertan.
Bost mailatan banatuko dituzte parte-hartzaileak: gazteak (1989-1991 urte bitartean jaiotakoak); gizonezko seniorrak eta emakumezko seniorrak (1970-1988 urte bitartean jaiotakoak) eta gizonezko beteranoak eta emakumezko beteranoak (1969 eta 1974 urteak baino lehen jaiotakoak).
Maila handiko partaidetza Herenegun arte 44 lagunek emana zuten izena, baina ez daude kezkatuak EATko kideak. «Oro har, azken egunetan eman ohi dute izena korrikalari gehienek. Urtero bezela 120 parte-hartzaile inguru espero ditugu», azaldu zuen Ibai Sa-
avedra EATko kideak. «Horien artean, Raul Viejo, Angel Macias edo Lurdes Oiartzabal bezalako korrikalariak izango dira, besteak beste. Guztiak, eskualdeko korrikalari onenetakoak dira», gaineratu zuten antolakuntzako kideek.
EATko kideek azaldu zutenez, arropa irteera gunetik helmugara eramateko zerbitzua izango da, 10:00etan. Bestalde, antolatzaileek parte hartuko duten guztiei proba aurretik proba medikuak egiteko gomendioa egin diete.
Korrikalarien esfortzua saritzeko, sari ederrak prestatu ditu EATk. 11:30ak inguruan izango da sari banaketa San Markoko gotorleku ondoko belardian egongo den oholtzan. Maila bakoitzeko lehen hiru sailkatuek jasoko dituzte sariak, baita EATko bi korrikalari onenek ere. Hala ere, helmugaratzen den orok jasoko du oroigarria. Sari guztien artean Mugaritz jatetxeak ematen duena nabarmendu zuten. «Oraintsu munduko laugarren jatetxe onena bezala izendatu dute. Ohorea da guretzako beren laguntza jasotzea», azaldu zuten.
Iturria: Oarsoaldeko Hitza
