Web
Analytics
Anbotoko Kilometro Bertikala jokatuko da igandean - Lasterketak.eus Anbotoko Kilometro Bertikala jokatuko da igandean - Lasterketak.eus

Anbotoko Kilometro Bertikala jokatuko da igandean

anboto km bertikalaIgandean Anboto Kilometro Bertikala jokatuko da Arrazolan. Parte-hartzaileek 1.100 metroko desnibel positiboa igo beharko dute 3,2 kilometrotan. Oso igoera gogorra da eta gorputzari mekanika berezia exijitzen dio, tontorrera iritsi nahi bada: besoek hankei laguntzen diete pausu bakoitzean, eta bizkarrak aurrerantz okertuta, alperreko pisua ekidin asmo du. Froga ikusgarria da zaleentzat eta erronka handia parte-hartzaileentzat. Horregatik izan zuen halako arrakasta iaz. eta horregatik etorriko dira espezialitateko korrikalari onenak aurtengo bigarren aldira.

Gizonezkoetan hiru bider munduko txapeldun izan den Agustí Roc eta egungo Espainiako txapeldun den Raul García dira izar nagusiak. Badira aipatzeko moduko beste izen batzuk ere: Jessed Hernández, Zago Didier, Miguel Caballero, Manu Pérez, Javi Olabarria eta Zuhaitz Ezpeleta, esaterako. Emakumeetan, Stephanie Jiménez –hirugarrena aurtengo Zegama-Aizkorri lasterketan– eta Oihana Kortazar –Espainiako txapelduna– dira faborito nagusiak. Irteera puntuan egongo dira Nerea Amilibia, Oihana Azkorbebeitia eta Alicia Olazabal ere.

Igandean 08:00etatik 09:30era dortsalak, txipak eta kamisetak banatuko dituzte. 10:00etan irtengo dira lehenengo korrikalariak, eta sari banaketa 14:00etan izango da.

Anboto Kilometro Bertikala antolatzen duen Brinean elkartearen aurtengo helburetako bat emakumeen parte-hartzea handitzea izan da. Horregatik, Alicia Romeroren eskuetan dagoen errekorra (54:38) apurtzen duenak 300 euroko aparteko saria izango du (600, guztira).

Anbotoko igoerak Euskal Herriko Igoera Bertikalen Zirkuituari hasiera emango dio. Zirkuitua Azpeitiko igoerak uztailaren 26an eta Uharte-Arakilgoak irailaren 20an osatzen dute.

Iturria: www.anboto.org