Aurreikuspenak bete egin dira Soraluze-Bergara krosean. Inoiz baino korrikalari gehiago atera ziren Soraluzeko plazatik zapatuan –504–; eta, modu horretan, antolatzaileek gura zuten kutsu herrikoia hartu zuen lasterketak. Nazioarteko parte-hartzaile barik, lasterketa oso borrokatua izan zen. Javier Galindo bilbotarrak irabazi zuen proba segundo bakarreko aldearekin, eta emakumezkoetan Nerea Etxeberria azpeitiarra izan zen azkarrena.
Bergarako Fraiskozuriko helmugara Bilboko Javier Galindo iritsi zen lehenengo –33:18–; eta, segundo bakarrera sartu zen Eñaut Insausti ordiziarra. Esan behar da, Galindok ederto sufritu behar izan zuela lehenengo postua eskuratzeko.
8. kilometroan egin zuen ihes
Iaz bezala, aurten ere Soraluzeko plazatik abiatu zen lasterketa. Hainbat parte-hartzailek amaieran adierazi bezala, hasierako puntu hori izan zen zailena askorendako; bai jende kopuruagatik eta baita aldapagatik ere. 20 laguneko taldea iritsi zen lasterketa buruan Osintxura. Zapatuan bero handia egin zuenez lasterkariek gogotsu hartu zuten seigarren kilometroan jarritako jan-edanak.
Galindok 8,5. kilometroan egin zuen ihes. “Azkeneko kilometroak oso gogorrak egin zaizkit”, azaldu zuen lasterketa amaieran. Bergarara metro batzuetako aldearekin iritsi zen Galindo; eta, kosta arren, tartea mantentzea lortu zuen helmugara sartu arte. Hirugarren postuan sartu zen Cipri Burcio legazpiarra –33:44–.
Emakumezkoak
Nerea Etxeberria azpeitiarra izan zen lehenengo emakumea Bergarako helmugan –41:00– . Azpeitiarrak abenduan jokatuko den Gasteizko maratoi erdia egin gura du eta Bergarara entrenatzera etorri zen: “Lehenengo aldia da lasterketa honetan parte hartzen dudana; hasieran gogorra egin zait, baina esan behar da oso ibilbide polita dela eta giroa aparta izan dela”.
Etxeberriaren atzetik Maitane Txueka sartu zen –42.20– eta hirugarren postuan Gema Hernandez –44:40–.
Sari-banaketa
Antolatzaileek arazoak izan zituzten sailkapena ateratzerako orduan, eta esan behar da uste baino gehiago itxaron behar izan zuela jendeak. Hala ere, lasterketa herrikoia zenez, eta opariak guztientzat zeudenez, jendea ez zen mugitu pilotaleku aurretik.
Maila bakoitzeko onenek saria eroan zuten; eta baita taldeek ere. Mutiletan Goierri, Txumis&Tximus eta Los Matos izan ziren hiru talde onenak; eta, neskatan Bagoiaztan, Arrasatekoak eta Antxintxikalariak. Bestalde, lehenengo debagoiendarrak eta bergararrak izan ziren: Arkaitz Ruiz de Loizaga eta Itziar Aldekoa.
Gaztetxoak
Nagusien krosa hasi aurretik, 16:00etan hasita gaztetxoen lasterketak egin zituzten. 97 neska-mutikok hartu zuten parte lasterketetan; eta, bergarakoez gain, inguruko herrietakoak ere izan ziren.
Sahara
Sahararen aldeko lagun talde batek 2010eko otsailean jokatuko den Saharako maratoian parte hartzeko gonbita egin zuen zapatuan. Eurak aurten izan dira maratoian; baina, datorren urteari begira 100 laguneko taldea batu gura dute. Maratoiaz gain, 20, 10 eta 5 kilometro lasterketak ere egiten dira, euren berbetan, edozeinek parte hartzeko modukoak. Interesa duenak blogak.com/saharamarathon helbidean izango du informazio gehiago.
Laguntzaileak
Antolatzaileek Servimasari eman zioten Antxintxika taldeak aurten Hondarribian irabazitako Emakumezkoen Euskadiko Triatloi txapelketako oroigarria; eta, Soraluze Danobatek jaso zuen Beasainen mutilek irabazitako Euskadiko mendi duatloiko txapelketako oroigarria.
Iturria: www.goiena.net
