Zegama-Aizkorri 2025 asteburua hasi duen Kilometro Bertikalean nagusitu dira, hurrenez hurren, 35’42’’ eta 44’13’’ko denborekin.
Nafarrak hirugarren garaipena lortu du jarraian proba honetan, eta kataluniarrak, berriz, bere lehen txapela eskuratu du, hiru bigarren posturen ostean.
Gaurkoa izan da asteburu biziko lehen proba, eta igandean ospatuko da 24. maratoia.
2025eko maiatzaren 23a.- Eguzkiak lainoak garaituz eta udaberriko giro betean, ostiral honetan zabaldu du oihala Zegama-Aizkorri maratoiaren 24. edizioak. Eta egin du, azken hamaika urteetan bezala, abiada bizian hasita eta korrikalarien azido laktikoa proban jarriz, hain teknikoa eta lehergarria den Kilometro Bertikalarekin. Ïu Net (laugarren saiakeran) eta Naiara Irigoyen (hirugarren garaipena jarraian) izan dira asteburu zirraragarri honetako lehen probako irabazleak.
Eguraldiak zeresan handia izaten du Zegama-Aizkorrin. Azken urteetako baldintza gogorren ostean —probaren ibilbidea moztu behar izan baitzen zenbaitetan—, 2025 honetan Kilometro Bertikala osorik egin ahal izan da: 3.000 metroko luzera eta 1.015 metroko goranzko desnibela, Zegama eta Iraule gailurra lotuz.
Ibilbide hori ederki ezagutzen zuen Ïu Net kataluniarrak, aurreko hiru edizioetan bigarren izan ondoren, aurten bai, txapela buruan etxeratzeko moduan izan baita. “Oso pozik nago. Laugarren aldia dut Kilometro Bertikalean eta, hiru bigarren posturen ondoren, garaipena lortzea oso berezia da, are gehiago lesio luze baten ondoren lehiatu gabe egon ondoren”, adierazi zuen Palautorderako korrikalariak. “Oso ondo sentitu naiz, indartsu hasi naiz eta amaieran oraindik indarra neukan Lluís (Puigverd) gainditzeko.” Netek 35’42’’ko denbora sinatu zuen, probaren errekorretik (Oriol Cardonaren 32’59’’) ia bi segundora. Podiumean Puigverd bera izan zuen alboan, bigarren (36’07’’), eta Ibai Larrea hirugarren (36’45’’).
Naiara Irigoyenek hirugarren urtez jarraian irabazi du emakumezkoen kategorian, 44’13″ko denborarekin. © Igor Quijano
Irigoyenek ez du barkatzen: hirugarren garaipena segidan
Emakumezkoen kategorian, Naiara Irigoyen faborito nagusia zen eta ez du aukerarik eman. Nafarrak 44’13’’ko denborarekin zeharkatu zuen helmuga eta Kilometro Bertikalean bere hirugarren garaipena segidan eskuratu zuen. “Laugarren urtea dut parte hartzen eta hirugarren aldiz irabaztea oso pozgarria da. Lurra nahiko lokaztuta zegoen, beraz, dibertigarria izan da. Goian garbi zegoen eta azkenik Irauletik ikuspegiak goza ditzaket. Aurten ez dut Maratoia korrituko, beraz, orain atseden hartu eta igandeko lasterketa beste modu batean bizitzeko aukera izango dut”, azaldu zuen txapeldunak.
Bigarren izan zen Anita Iversen noruegarra (46’29’’) eta hirugarren, Silvia Lara, 46’42’’ko denborarekin. Emakumezkoen probaren errekorra, berriz, Laura Orgué kataluniarrak du oraindik: 2017an lortutako 41’40’’ko marka ikusgarria.
Igandean, maratoia osorik telebistan
Bere 24. edizioan, Zegama-Aizkorri maratoia zuzenean jarraitu ahal izango da ETB1en (euskaraz) eta streaming bidez, Zegama-Aizkorriren YouTubeko kanaletan (gaztelaniaz eta euskaraz) eta Golden Trail World Series zirkuituaren kanalean (ingelesez).
Zuzenean Zegama-Aizkorri YouTube kanalean
Zuzenean Golden Trail World Series YouTube kanalean
XI. ZEGAMA-AIZKORRI KILOMETRO BERTIKALEKO PODIUMA
Gizonezkoetan
- Ïu Net 35’42’’
- Lluís Puigvert 36’07’’
- Ibai Larrea 36’45’’
Emakumezkoetan
- Naiara Irigoyen 44’13’’
- Anita Iversen 46’29’’
- Silvia Lara 46’42’’
Ïu Net, aurtengo Kilometro Bertikaleko irabazlea. © Igor Quijanori
