Mendi lasterketen sukarra hedatuz doa, eta astebururo modalitateko hainbat proba antolatzen dituzte Euskal Herri osoan. Atzo, esaterako, bi jokatu zituzten eskualdean: Pagoeta Mendi Lasterketa eta Izarraitz Mendi Lasterketa. Egun eta ordu berean antolatu zituztenez, parte-hartze xumeagoa izan zuen batak zein besteak. Horrez gain, Zegama-Aizkorri mendi maratoia baino astebete lehenago izateak ere ez zuen gehiegi lagundu. Edonola ere, parte hartzera animatu zirenek gogotik gozatu zuten Urolaldeko nahiz kostaldeko maldatan gora eta behera.
Ruben Lanz legazpiarra eta Aitziber Ibarbia zizurkildarra izan ziren Zarauztik Pagoetako gurutzera joan-etorria egiten bizkorrenak. Biek aise irabazi zuten, bigarren sailkatuei minutu batzuetako aldea aterata. Nolanahi ere, lasterketako errekorretik urruti geratu ziren. Emakumezkoen podiuma, bien bitartean, eskualdeko korrikalariek osatu zuten: Leire Atxutegi zumaiarra bigarren postuan helmugaratu zen, eta Itziar Izagirre, berriz, hirugarren. Atxutegik, bere aldetik, Amaia Azkue zenari eskaini nahi izan zion bere lorpena. Guztira, 197 lagunek amaitu zuten erronka; apustuak tarteako, ibilbidea abarkekin osatu zuenik ere izan zen.
Azpeitian, 147 korrikalarik gainditu zituzten Izarraizko hiru tontorrak. Duela bi urte bezalaxe, Walther Becerra izan zen garaile gizonezkoetan; eta haren atzetik etxekoak helmugaratu ziren: Xabat Manzisidor eta Enekoitz Aizpuru azpeitiarrak, hurrenez hurren. Emakumezkoetan, Urruñako bizilagun Maoud Combarieuk erakustaldi ederra eman zuen. Irabazteaz gain, Nerea Amilibiaren errekorra ia 5 minututan hobetu zuen. Amilibiak berak ere bere denbora hobetu zuen, lasterketa bikaina eginda, baina bigarren postuarekin korformatu behar izan zuen.
IX. PAGOETA MENDI LASTERKETA
Gizonezkoak
1. Ruben Lanz 01:05:24
2. Iker Oliveri 01:08:46
3. Luis Mari Otegi 01:09:02
Emakumezkoak
1. Aitziber Ibarbia 01:19:47
2. Leire Atxutegi 01:24:16
3. Itziar Izagirre 01:25:13
Eskualdeko onenaren HITZA Saria.
1. Mikel Iruretagoiena (Aia)
1. Leire Atxutegi (Zumaia)
VIII. IZARRAITZ MENDI LASTERKETA
Gizonezkoak
1. Walther Becerra 01:56:08
1. Xabat Manzisidor 02:00:47
1. Enekoitz Aizpuru 02:00:58
Emakumezkoak
1. Maud Combarieu 02:21:56
2. Nerea Amilibia 02:24:33
3. Yolanda Gurendez 02:34:26
Iturria: http://urolakosta.hitza.info
